3/20/11

PA-tok CANTON


Nang mag-grocery kami noong nakaraang linggo. Nagulat ako nang makakita ng limang Lucky Me Pancit Canton sa cart (assorted flavor pa!). Napatingin ako sa aking asawa at tumingin din siya sa akin at ngumiti..

“Maalat yan..puro MSG.”
“Eh, minsan lang naman…”
“Minsan? One Lucky me per day?”

Hindi ako mahilg sa instant pancit canton dahil sa tatlong dahilan;

Una, mataas ang MSG content nito. Noong huling check-up nga sa akin ay lumabas na hindi na talaga ito nakakabuti sa katawan ko.

Pangalawa, walang challenge lutuin, para lang akong nagpapakulo ng tubig na mainit bago maligo. Mas nalilibang kasi akong magluto pag meroon pang hinihiwa.

Pangatlo, nasawa na ako dito. Noon kasing nag-aaral ako sa kolehiyo, at nakatira sa isang maliit na apartment sa Maynila ay ito ang almusal, tanghalian, meryenda, hapunan at midnight snack ko. Mura kasi at sapat para may matira pa sa baon. Na-addict pa nga dito ang isa kong kasama sa bahay. Kaya sa tuwing may christmas party kami at may exchange gift ay isang kahong pancit canton ang nasa wishlist nya. Natutupad naman iyon at nasunndan pa pati pag birthday nya. Noong nag-asawa at nagka-anak siya, ay pinangalanan niyang “Lucky” ang anak at ang nickname ay “Anton”…Ayos!

Pero kung Pancit Guisado ang pag-uuspan…Una sa listahan ko ang Pancit Canton. Mas malinamnam kasi at masarap kainin..

Kung sa bagay, sino ba naman ang hindi nasasarapan sa Canton!?

Heto ang isa sa recipe ng Pancit Canton na laging pumapatok.

Ito ang aking PA-tok CANTON.

MGA SANGKAP

½ kilo Pancit Canton
¼ kilo Manok (breast) – Pakuluan sa 1 litrong tubig ng 15 minuto at lagyang ng kaunting asin at paminta. Himayin ng pahaba.
*Itabi ang pinagpakuluan.
10 grams na hipon (tinaggal ang ulo, at binalatan)
*Dikdikin ang ulo, pigain, kunin ang katas at itabi
10 grams na atay ng baboy (hiniwang pahaba)
1 pirasong chorizo de bilbao na hiniwa ng pabilog at pinirito.
5 pirasong kikiam na hiniwang pahaba at pinirito
5 pirasong squid ball na hiniwa sa gitna at pinirito
½ cup Dried Shitake Mushroom binabad sa mainit na tubig at hiniwa ng manipis.
Repolyo (chopped)
Carrots (Hiniwa ng pahaba)
Brocolli
Sitsaro (snow peas)
Sibuyas na mura (spring onion)
150 ml or ¾ tasa ng Oster Sauce
Sibuyas
Bawang

PARAAN NG PAGLUTO

Mag-gisa ng bawang at sibuyas sa malaking kawali. Ihulog ang atay at maglagay ng kaunting asin at paminta. Hayaan maluto ng kaunti ang atay bago ilagay ang ibang sangkap. Ibuhos ang katas ng hipon at hayaang kumulo ng ilang minuto. Ibuhos ang manok , shitake mushroom at haluin. Mag hintay ng ilang minuto upang kumapit ang lasa, bago ihulog ang repolyo, carrots, sitsaro at brocolli. Ibuhos ang oyster sauce, haluin at takpan ng limang hanggang sampung minuto minuto. Hanguin at itabi pero iwan sa kawali ang sabaw. Ibuhos pa ang pinagpakuluan ng manok at hayaang kumulong muli. Ilagay ang pancit canton at patuloy na haluin hanggang sa maluto. Ibuhos ang nilutong sangkap kasama na ang choriso de bilbao, kikiam, squid ball at haluin muli. Tikman at lagyan ng asin at paminta ayon sa panlasa Ibudbod sa ibabaw ang hiniwang sibuyas na mura. Ihain kasama ang mainit na pandesal.


Sarap: 5/5 – Eto ang Canton na hindi malilimutan.
Halaga: 2/5 – Pang piyesta opisyal
Preparasyon: 2/5 – Hihingalin pagkatapos.

3/14/11

Heverybody's Appy!

May lai hakong kapampangan. Kapampangan ing tatay ko hat bulakenya naman ing nanay ku. Hang resulta? Haru, hisang masanting na hartistahing bata. Pero kait ganun ako ay ali hakong natutong mag kapampangan. Trying ard lang kung minsan tulad ngeni.
Mas sanay hat kumportable hakong magtagalog. Mas malinaw kung tagalog na lang dail na iirapan na rin kaku

Whew! Ang hirap..parang nauubusan ako ng hangin sa baga sa dami at kakulangan ng haitch (“H” )sa bawat salita. Bagamat hindi ako sanay sa dialekto nila, nasa akin parin ang kulturang kapampangan pagdating sa kainan. Bata pa lang ay namulat na ako sa mga pagkaing kapampangan. Bukod sa tocino, longanisa mapa Pampangga's Best man o Mekeni Food ay naging paborito ko rin ang kalamay, adobong kapampangan (adobong puti), buro at bringhe (local paella). Kadalasan ang tatay ko ang nagluluto nito, at madalas niyang ikwento na natutunan pa niya ito sa aking lolo. Tulad nga ng lagi niyang sinasabi, likas sa mga kapampangan ang masarap magluto. Ito ang palusot niya sa tuwing naabutan ko siya sa kusina. Naniwala naman ako kaya ina-apply ko hanggang ngayon at kinakatuwa naman ng asawa ko. Mana-mana lang talaga…

Noong nakaraang linggo ay kaarawan ng aking tatay. Dahil sa ayaw daw niya maghanda sa bahay ay naisipan kong ayain siyang kumain sa labas. At upang mas maging makabuluhan sa kanya ang araw na iyon ay ibinalik ko siya sa lugar na kinalakihan niya..ang Pampangga..

Dahil authentic kapampangan cuisine ang hanap ko ay isang lugar lang ang naisip ko. Ang Everybody’s CafĂ©. Pamilyar ang tatay ko sa lugar pero para sa akin, unang beses ko palang itong susubukan. Matatagpuan ito sa Mc Arthur Hiway, Del Pilar San Fernando City Pampangga.





Isang tipikal na restaurant/cafeteria lang ang hitsura ng lugar. Wala ang magarbong dekorasyon o kasangkapan tulad nang una kong inasahan. Pagpasok sa pinto ay bubungad agad ang isang mahabang estante kung saan nakalagay ang mga pagkain. Turo-turo style na karaniwan na makikita sa mga simpleng kainan. Ayos lang para sa akin 'to, mas nagiging madali kasi ang pag-order at nakikita ko ang aktwal na hitsura ng putahe at hindi masisira ang expectation ko. Mababait ang crew, maasikaso at i-guguide ka nila sa mga pagkain na nasa harapan. Pwede rin umorder nang small order sa ibang mga putahe, kung kaya mas maraming putahe kang matitikman. Isa pa sa nagustuhan ko ay ang pagpayag nila na tikman ko muna ang pagkain bago orderin. Nagpapakita lang na mataas ang kumpyansa nila na magugustuhan ko ang mga pagkain nila.



Una kong sinubukan ang piniritong hito na may kasamang buro at sariwang mustasa. Ang karaniwang buro na nakakain ko ay kadalasang masama ang amoy. Pero dahil sa nasasarapan ako sa lasa ay tinitiis ko ito. Iba ang buro dito, wala ang masamang amoy, pero nandun parin ang masarap na lasa. Samahan ng sariwang mustasa at ang malutong na prito sa hito..eto na ang kumbinasyon na hinahanap-hanap ko!


Morcon ang tawag nila dito; pero sa hitsura at lasa ay parang imbutido. Kakaiba ang sauce na sa tingin ko ay kumbinasyon ng tomato sauce at gatas. Sobra ang linamnam kaya madali kong pinagsawaan. Medyo maalat ang timpla sa aking panlasa , pero may kakaibang appeal kung bakit isa ito sa binabalikan.


Ngayon ko nalaman na hindi lang tocino at longanisa ang matamis na pagkaing kapampangan. Nagulat ako sa lasa ng Vegatable seafoods nila na naghahalo ang alat at tamis, nakakagulat pero nasarapan ako…




Isa pa sa sumupresa sa akin ay Ginisang kamias sa hipon. Kadalasan ay nalalaglag lang ang kamias sa bakuran namin at hindi ko naisip na meron pa pala itong silbi, bukod sa pangsahog sa sinigang o pangat. Bagay na bagay ang asim ng kamias upang maging katamtaman ang lasa ng hipon na swabe sa aking panlasa.



Tapang damulag ay mas malasa sa karaniwang tapa. Ang damulag ay kalabaw sa tagalog. Hindi matigas ang laman tulad ng una kong inasahan, nag-aagaw ang asim at tamis na mukhang masarap na almusal ka-partner ng garlic rice at mainit na tsoklate.



Kung exotic food trip ang hanap. Mild pa para sa akin ang Betute Tugak (relyenong palaka sa tagalog). Malaswa lang talaga tingnan ang hitsura ng nakabukakang palaka, pero hindi naman ang lasa. Para lang kumakain ng piritong manok.




Eto ang isang bagay na matagal kong pinag-isipan bago subukan. Matagal ko nang alam na isa ito sa pagkain na sikat sa mga kapampangan. Pero hindi ko pa natitikman . Ngayon ang unang pagkakataon na kumain ako ng Adobong kamaru (mole crickets).



Tatlong step lang lang paraan ng pagkain.

Titig…Amoy…Subo..! (sa tono ng bagong surf commercial na patak..pahid..buhos..! kumembot kung kina-kailangan)




Hindi masama ang lasa. Sadya lang may kakaiba itong texture na kapag nginuya ay pinapaalala ng isip mo na insekto ang nasa bibig mo. At dito na magiging pahirapan ang paglunok.

Sa kabuuan, naging masarap at masaya ang kainan…sinasabayan kasi ng bawat subo at pagkain sa hapag ang mga kwento at ala-ala ng tatay ko noong kabataan niya.. At ito ang lalong nagpabusog sa aming lahat.




Sarap: 4/5 – Sa lawak ng mga putahe..siguradong may angkop sa panlasa mo!
Presentasyon: 3/5 – Hindi uso ang plating…
Lugar: 3/5 – Hindi pang site seeing…
Serbisyo: 5/5 – Bago ka pa magtanong may sagot na ang mga crew…
Halaga: 4/5 - Small order para sa small budget.

3/7/11

A.S.I. (Adobo Systems Inc.)


Paborito ko ang adobo. Isa kasi ito sa pinaka simple putahe na walang kaparis sa sarap. Hindi ko ipagpapalit ang adobong pinoy sa adobado ng Mexico na minsan ko nang natikman. Adobo nang nanay ko ang klasikong paraan na pagluluto ng adobo na alam ko. Simple lang kasi ito, pagsasama-samahin lang ang lahat ng sangkap, at lulutuin sa mahinang apoy hanggang sa lumambot at kumatas ang langis mula sa karne, mapa manok o baboy man. Resulta? 100% purong sarap! Ang siguradong hahanap-hanapin mo..

Sampung taon pa lang ako noong una kong subukan na magluto ng adobo. Sobrang alat, sobrang asim, sobrang tamis na sinamahan pa nang pait ng maitim na karne dahil sa pagkasunog. Hmmm..hindi na masama sa sampung taon na dapat ay jolens at text pa lang ang hinahawakan.

Maaga akong namulat sa kusina. Naging panuntunan kasi sa aming bahay ang “division of labor”. Hindi ko naman masasabing abuso iyon,dahil kusang loob naman naming ginagawa nang may ngiti ang bawat trabaho. Kaya’t kung sino man ang mga nangutya sa akin noon at ngayon na napabayaan ako sa kusina..hindi ako apektado! Totoo kasi...

Mula noong sampung taon ako hanggang ngayon ay hindi tumigil ang kagustuhan kong makapagluto ng adobo na hinahanap ng panlasa ko. Hango sa ibat-ibang teknik, mula sa ibat-ibang paraan nang pagluluto nito at nakagawa ako nang sariling bersyon. Sakto sa alat, asim at tamis. Sakto sa sawi sa pag-ibig, may bagong pag-ibig at matagal nang umiibig. Pwede sa tag-araw o tag-ulan. Pwedeng pang araw-araw at hindi pagsasawaan..

Ganito katindi ang buid-up ko, para lang maniwala kayong MARUNONG AKONG MAGLUTO!!!!

Mga Sangkap:
1 kilong baboy (liempo)
Sampung butil ng bawang
Kalahating Tasang Toyo
Kalahating Tasang Suka
Dalawang kutsarang oyster sauce
Dalawang kutsarang Asukal na pula
Isang kutsaritang pamintang buo
isang dahon ng Laurel
Kalahating tasa ng tubig.

Paraan ng Pagluluto:

Sa isang kaldero ay ilagay ang baboy, isang butil ng dinikdik na bawang,laurel,pamintang buo,asukal,toyo,oyster sauce at tubig. Haluin mabuti hanga maging pantay ang kulay ng karne. Ibuhos ang suka (pagkabuhos ng suka ay sadyang hindi ko ito hinahalo hanggang sa kumulo, sa paniniwalang mas nagiging pantay ang lasa nito kung kusa itong manunoot sa karne. Wala naman masama kung maniwala sa kasabihan ng matatanda..) Isalang sa mahinang apoy at hayaang kumulo bago haluin. Tatagal nang halos apat-napung minuto bago patayin ang apoy. Siguraduhing hinahalo paminsan minsan upang hindi masunog o manikit ang laman.

Habang pinapalambot ang karne, kumuha ng kawali at lagyan ng isang tasang mantika. Ihulog ang dinikdik na natirang bawang at lutuin hanggang maging malutong light golden brown. Wag hayaang masunog ang bawang. Itabi ang kawali at mantika na pinag lutuan ng bawang.

Hanguin ang karne matapos itong mapalambot at ibukod ang pinagpakuluan. Isalang muli ang pinagpakuluan hanggang sa mag reduce ng kaunti , ito ang magsisilbing sarsa ng adobo. . Muling initin ang mantika na pinaglutuan ng bawang, dito ay ipipirito ang karne hanggang maging golden brown at mag karamel ng kaunti. Hanguin at i-drain ang mantika.

Muling ibalik ang karne sa sarsa nito at ibudbod ang tinustang bawang. Ihain kasama ng mainit na kanin.

Sarap: 5/5 - Extra Super Sarap
Halaga: 5/5 - Kayang-kaya ng minimum wages
Preparasyon: 3/5 - Tagaktak ng konti ang pawis