A B K D

Bago pa man mag tatlong taon si Gaby ay nahilig na siya sa pagsulat gamit ang lapis at papel. Maaga kong nakita sa kanya ang kakayahan at tamang paraan sa paghawak ng lapis; nagsimula sa vertical, horizontal at paiko-ikot na mga linyang walang katapusan. Noong nagsimula siyang mag-aral, natuto siyang mag trace ng letra, nagulat nga ako ng minsang pagdugtong-dugtungin niya ang ilang tuldok sa isang libro. Kasabay nito ay ang parami ng parami na sulat sa pader ng bahay. May mga linya sa sala. May hugis bilog sa kwarto at may iba-ibang hagod ng kulay sa pinto. Kahapon ay ginulat ako ni Gaby; sa unang pagkakataon ay sinulat niya ang nickname niya ng mag isa at walang tuldok na susundan. Bagamat hindi pa madaling maintindihan, e mukhang magandang simula....

HVD

Ang sarap ng buhay sa piling nyo....

Maligayang araw ng mga puso....

Ash Wednesday

Humabol kami sa misa kagabi para sa pagdiriwang ng Ash Wednesday. Nagtaka si Gaby ng makita niya ang ilang tao na may bahid ng itim na krus sa noo. Tinanong niya ako kung ano yun? Sinabi ko na iyon ang star na binibigay ni Jesus sa mga mababait na bata, parang star din na binibigay sa kanya ng titser niya pag very good siya sa klase. Gusto daw niya noon!

Nang mapahiran na kami ng abo sa noo. Nakita ko sa asawa ko ang pagkagulat ng makita ako. Pilit na pinipigil ang tawa at sinabing  "napalaki ang krus sa noo mo!". Hindi ako naniwala inisip ko na inaasar lang niya ako. Maya-maya pa ay humarap sakin si Gaby.

"Daddy, I want to have a big cross like that!" (Sabay turo sa noo ko).

Tumingin ako sa salamin at napatunayang halos kalahati ng mukha ko ang sakop ng krus sa noo ko.

"Anak, wala sa laki yan, mukhang napagtripan lang ang daddy mo ni Father!"

Agad akong nagnilay...

My Favorite Things!

Raindrops on roses and whiskers on kittens
Bright copper kettles and warm woolen mittens
Brown paper packages tied up with strings
These are a few of my favorite things!

Cream colored ponies and crisp apple strudels
Doorbells and sleigh bells and schnitzel with noodles
Wild geese that fly with the moon on their wings
These are a few of my favorite things!

Girls in white dresses with blue satin sashes
Snowflakes that stay on my nose and eye lashes
Silver white winters that melt into spring
These are a few of my favorite things!

When the dog bites, when the bee stings
When I'm feeling sad,
I simply remember
my favorite things
and then I don't feel so bad!


Tuwing naririnig ko ang kantang to, bumabalik sa ala-ala ko ang masasayang panahon ng mga unang buwan ni Gaby sa mundo. Eto kasi yung kantang nagpapatulog sa kanya at nag papatahan sa tuwing iiyak siya.
Ngayon ay tatlong taon na ang nakalipas at hindi ko na masyadong napapatugtog ang kantang 'to. Baka nga hindi narin siya pamilyar sa tono at ritmo nito. Pero, ito parin ang nagiging inspirasyon ko sa pag papasaya sa anak ko. Sa tuwing natatakot siya, umiiyak o nalulungkot. Pinapaalala ko sa kanya ang mga bagay na gusto niya, mga pagkain na paborito niya, mga lugar na gusto niyang puntahan at mga taong gusto niyang kasama.

Ito ang ilan lang sa paborito niya;

Bagay - Bola
Hindi niya pagpapalit ang bola sa kahit anong mamahaling laruan. Pag dinala mo siya sa toy kingdom, siguradong hihiling siya na ibili siya ng bola. Sa mga oras na ito humigit kumulang 506 na bola na ang pag-aari niya (hindi ito exaggeration!).

Pagkain - Pancit Canton
Dahil sa hilig niya sa Pancit Canton, lahat nalang ng pasta na masarapan niya ay Pancit Canton na ang tawag niya. Kung kaya ko nga lang ipa-ban ang commercial ng Lucky Me Pancit Canton sa lahat ng TV station ay ginawa ko na. Nagiging sanhi kasi ng iyakan pagnapapanood nya ito at hilingin na ipagluto ko siya.

Lugar- Time Zone
Marinig lang niya ang ingay sa loob nito solb na siya. Hindi naman niya kailangan maglaro, masaya na siya na nadoon siya.

Tao - Tatay
Pag si tatay na ang usapan, kakalimutan na niya lahat ng mga bagay na nabaggit sa itaas. Hindi ko alam kung anong hiwaga meron ang tatay ko na kaya ipagpalit ni Gaby pati ako sa kanya.

Maligayang tatlong taong kaarawan Gaby. Mahal na mahal kita, at ikaw ang nag iisang paborito ko! (hanngat hindi pa nakakabasa si Lucas).

Maligayang Anim na Taon

Anim na makabuluhang taon na kasama kay hindi pala ganoon katagal. Para kasing kalian lang yung araw na tayo ay kinasal. Sa una ng taon, ay puro saya lang at walang humpay na pasyal, hanggang sa naispan natin na mas masaya ang bawat araw, kung may paslit na ang gusto mo pa ay yung kambal. Ikalawang taon ng humiling tayo sa Maykapal. Lahat ng bagay sinubukan kahit na nga yung sayaw sa obando at hilot na may ritwal. Ikatlong taon ay dininig ang dasal, para akong nakalutang sa saya at nakahiga sa ulap na makapal. Isang batang babae na sobrang cute parang ikaw, pero habang lumalaki ay parang ako na raw ang kakambal. Sa ikaapat na taon ay umapaw ang ligaya ng walang sagabal. Isang munting tahanan ang binuo na puno ng pagmamahal. Ikalimang taon ay panibagong buhay ang bumukal, at sa ikalawang pagkakataon ay dininig ang dasal. Sa ika-anim na taon ay sinalubong tayo ng pagsubok. Halos gumuho ang pangarap at napuno ng sagabal. Pero hindi tayo sumuko, dahil lalong tumatag na parang bakal ang pagmamahal.

Maligayang anim na taon ! Ikaw lang ang nag-iisa kong mahal!

2013

2012 ang pinaka makabuluhang taon sa buhay ko. Ito ang taon ng pagsubok, pag-ibig at tagumpay. Sa taong ito ko naranasan ang halaga ng buhay at ang pait na kayang idulot nito. Dito ko naranasang halos isuko ang laban at dito rin dumanak ang pinaka maraming luhang naipatak ko sa buong buhay ko. Pero ito ang taon na natutunan ko ang halaga ng bawat biyayang natatangap ko. Dito ko nakilala ang mga totoong kaibigan na handang dumamay at ang pamilyang nagbigay ng pag-ibig na walang kapalit. Dito ko nakilala ang sarili ko na nasasaktan, umiiyak at natatakot. Dito ko natutunang lumaban para sa taong mahal ko. Dito ko natutunang sumugal at harapin ang takot. At ang pinaka mahalaga, sa taong ito ako nagtagumpay.

 

Ang biyaya ng Maykapal ay hindi laging nakabalot sa makinang na kahon.

 

Salamat Panginoon sa malusog na pamilya. Wala na akong hiling sa mga darating na taon kung hindi ang patuloy na kalusugan nila....

 

 

Mahal ko kayo at ang pamilya ko.

 

Amen.