China Arabia

Nasa China pala ako, kala ko nasa Saudi Arabia. Sa tuwing oorder kasi ako ng pagkain ay nagugulat ako sa kanilang generous serving of oil. Ang akala ko tuloy ay nalipat na sa China ang pinaka malaking imbakan ng langis sa mundo.

Bicol Express to the MAX!

Hindi pa ko nakakarating sa Bicol. Pero bakit ang dami kong paboritong pagkain na galing o gawa sa Bicol. Mahilig ako sa Pili nuts, lalo na pag nakalagay pa sa shell at ako pa yung mag bubukas. Mas may challenge mas masarap.

Paborito ko rin ang laing, minsan nga ay pinapalaman ko pa to sa pandesal at mas ginaganahan pa ako kapag ako mismo ang nag kudkod at nagpiga ng niyog.

Nakakain narin ako ng pansit bato, sabayan pa ng dinuguan, ang sarap!

At syempre ang pinaka paborito ko at nagpapainit ng araw ko..ang Bicol Express to the max!

SANGKAP:

1 kilo Liempo (Ihiwalay ang taba at balat at hiwain na pa cubes)
1 Malaking Sibuyas na Puti (chopped)
2 Niyog (2 tasa ng kakang gata at 4 na tasa ng ikalawang piga)
1/4 na kilo ng siling berde o siling pang sigang (chopped)
1 kutsarang siling labuyo (chopped)
1 kutsarang luya (crushed)
1 kutsarang bagoong alamang
1/2 kutsarang chicken powder
asin at paminta


PARAAN NG PAGLUTO:

Ilagay ang taba at balat ng baboy sa kawali. Hayaang maluto hanggang sa lumabas ang sariling mantika. Ibuhos ang luya at igisa. Ilagay ang sibuyas at siling berde. Haluin muli bago ibuhos ang liempo. Lagyan ng kaunting asin at paminta. Haluin at hayaan ng ilang minuto. Ibuhos ang 4 na tasa ng ikalawang gata. Ilagay ang chicken powder at ang bagoong alamang. Haluin muli at takpan. Pakuluin sa mahinang apoy ng 2 at kalahating oras. Ibuhos ang 2 tasang kakang gata at hayaang kumulo pa ng 30 minuto. Mapapansin na nagmantika na ang gata at halos lusaw na ang mga sili. Patayin ang apoy. Ihain kasabay ng mainit na kanin.

Sarap: 5/5 - Mapapasipol ka sa sarap.
Halaga: 3/5 - Kung mahal ang liempo, pwede ang pigue o tiyan.
Preparasyon: 4/5 - Mas masarap kung ikaw mismo ang pipiga ng kakang gata.

Si Jose, Ako at si Crisostomo

Si Dr. José Protasio Rizal Mercado y Alonso Realonda (Hunyo 19, 1861–Disyembre 30, 1896) ay ang pampito sa labing-isang anak ng mag-asawang Francisco Engracio Rizal Mercado y Alejandro at ng asawa nitong si Teodora Morales Alonzo Realonda y Quintos. Ipinanganak si José Rizal sa Calamba, Laguna. Sina Saturnina, Paciano, Narcissa, Olimpia, Lucia, Maria, Jose, Concepcion, Josefa, Trinidad at Soledad ang kanyang mga kapatid.

Si Lloyd Sese y Rivera (Hunyo 19, 19SECRET - Humihinga pa hanggang sa kasalukuyan) ay ang pang apat at bunso sa apat na anak ng mag-asawang Mario Sese y Lagman at ng asawa nitong si Genoveva Rivera y Estrella. Ipinanganak si Lloyd Sese sa Guiguinto, Bulacan. Sina Levi, Rodel at Sheryll ang kanyang mga kapatid.

Ang ina ni Rizal ay siyang kaniyang unang guro at nagturo sa kaniya ng abakada noong siya ay tatlong taon pa lamang. Noong siya naman ay tumuntong ng siyam na taon, pinadala siya sa Biñan, Laguna upang mag-aral sa ilalim ng pamamatnubay ni Justiano Aquino Cruz. Ilang buwan ang nakalipas, pinayuhan niya ang magulang ni Rizal na pag-aralin siya sa Maynila.

Ang ina ni Lloyd ay siyang kaniyang unang guro at nagturo sa kaniya ng abakada noong siya ay limang taon na (slow learner). Noong siya naman ay tumuntong sa anim na taon, pinadala siya sa Balagtas,Bulacan upang mag-aral sa ilalim ng patnubay ni Mrs. Martin (hindi ko na tanda ang buo niyang pangalan). Ilang buwan ang nakalipas, sinabihan niya ang magulang ni Lloyd na sakit ito sa ulo dahil sa sobrang daldal.

Ang Ateneo Municipal de Manila ang unang paaralan sa Maynila na kaniyang pinasukan noong ikadalawa ng Enero 1872. Ayon sa isang salin ng Noli me tangere ni Guzman atbp., sa kaniyang pananatili sa paaralang ito, natanggap niya ang lahat ng mga pangunahing medalya at notang sobresaliente sa lahat ng aklat. Sa paaralan ding ito niya natanggap ang kaniyang Batsilyer sa Sining na may notang sobresalyente kalakip ang pinakamataas na karangalan.

Ang La Consolacion sa Balagtas Bulacan ang unang paaralan na kaniyang pinasukan noong ikadalawa ng Hunyo 19XX. Ayon sa isang salin ng kwento ng mga tsismosa sa Bulacan atbp., sa kanyang pananatili sa paaralang ito, natanggap niya lahat ang mga pangunahing medalya sa Loyalty award at best in writing noong kinder.

Nang sumunod na taon, siya ay kumuha ng Pilosopiya at Panitikan sa Pamantasan ng Santo Tomas. Sa Ateneo, kasabay niyang kinuha ang agham ng Pagsasaka. Pagkaraan, kinuha niya ang kursong panggagamot sa nasabing Pamantasan (Santo Tomas) pagkatapos mabatid na ang kaniyang ina ay tinubuan ng katarata. Noong Mayo 5, 1882, nang dahil sa hindi na niya matanggap ang tagibang at mapansuring pakikitungo ng mga paring Kastila sa mga katutubong mag-aaral, nagtungo siya sa Espanya. Doo'y pumasok siya sa Universidad Central de Madrid, kung saan, sa ikalawang taon ay natapos niya ang karerang Medisina, bilang "sobresaliente" (napakahusay). Nang sumunod na taon, nakamit niya ang titulo sa Pilosopiya-at-Titik.

Nang sumunod na mga taon, siya ay kumuha ng Bachelor of Science in Electronics & Communication Engineering sa Adamson University. Sa labas ng paaralan kasabay niyang kinuha ang pag mamadyik at pagtambay sa bilyaran. Pagkaraan ay kumuha din siya ng kurso sa pag-arte pagkatapos mabatid na pangarap ng nanay niya ang magkaroon ng anak na sikat. Noong 2002, nang dahil sa hindi na niya matanggap ang tagibang at mapansuring pakikitungo ng mga kakilala na hindi siya artistahin ay nagpasya siyang magtungao sa Laguna upang doon nalang magtrabaho. Doo'y pumasok siya sa Hitachi GST Philippines, kung saan, sa ikalawang araw pa lang ay naiwan na siya ng shuttle papasok sa opisina kaya nag lakad, nag jeep at naligaw. Nang sumunod na taon ay nakuha niya ang perfect attendance award dahil sa hindi pag-absent kahit walang ginagawa.

Naglakbay siya sa Pransya at nagpakadalubhasa sa paggamot ng sakit sa mata sa isang klinika roon. Pagkatapos ay tumungo siya sa Heidelberg, Alemanya, kung saan natamo pa ang isang titulo.
Sa taon din ng kaniyang pagtatapos ng Medisina, siya ay nag-aral ng wikang Ingles, bilang karagdagan sa mga wikang kaniya nang nalalaman gaya ng Pranses. Isang dalubwika si Rizal na nakaaalam ng Arabe, Katalan, Tsino, Inggles, Pranses, Aleman, Griyego, Ebreo, Italyano, Hapon, Latin, Portuges, Ruso, Sanskrit, Espanyol, Tagalog, at iba pang mga katutubong wika ng Pilipinas.

Naglakbay siya sa Singapore at nagpakadalubhasa sa pagpuna ng mali ng ibang kumpanya. Pagkatapos ay tumungo sa Batam, Indonesia, kung saan siya unang nakakita ng aquariun na maraming sumasayaw na hindi isda.

Marami pang pagkakapareho ang buhay namin ni Rizal, kasama na dito ang dami ng naging babae niya. Ay ako pala isa lang...si Grace lang.

Pero ang pinaka malaking pagkakapareho namin ay parehong Birthday namin ngayon.

Upang lubos kong madama ang kabayanihan ng idol ko. Pinili kong i-celebrate ang birthday ko sa isang restaurant sa Solenad Nuvali Sta. Rosa Laguna ang Crisostomo. Hango kay Crisostomo Ibarra o Juan Crisostomo Ibarra y Magsalin na pagunahing tauhan sa nobela ni Jose Rizal na Noli Me Tangere.



Bilib ako sa mga putaheng inihahain ng restaurant na ito. Bukod sa lahat ay pinoy na pinoy ay nakaka-aliw ang mga pangalan ng putahe na simisimbolo sa mga tauhan ng mga nobelang akda ni Rizal at ilan sa mahahalagang bahagi ng buhay niya.

Para sa inumin ay umorder ako ng Tamarind Ice Tea (Bottomless). Unang pagkakataon kong nakainom ng sampalok juice..akala ko kasi dati ay pangsigang lang ang sampalok. Pwede rin palang gawing pampalamig na totoo naman refreshing!

Si Grace naman ay umorder ng Calamansi with malunggay juice. Parang pagkainom mo nito ay sumabak ka na rin sa isang cleansing diet at makakahiyan mo nang kumain ng kolasterol.

KKK Barbeque. Pangalan pa lang ay parang may himagsikan ka nang sasabakan. Masarap at malasa. Pero sa halagang 185 (2 pcs.), parang pera ang napunit ko at hindi cedula.


Pinoy Paella. Mapapakanta ka na "Ako'y isang Pinoy sa pusot diwa..." sa sarap ng paellang ito. Hindi matapang ang lasa tulad ng kadalasang paella na nakain ko. May sahog na sugpo, liempo, manok at adobo flakes. Ito ang dahilan na naglasang pinoy ang paellang 'to. Sa halagang 350 ay pwedeng pagsaluhan ng 3 tao.

Halo-halo ni Crisostomo sa dessert. Malinamnam pero hindi matamis. Sa tantya ko ay ang gatas na ginamit dito ang nagpalinamnam ng lasa nito. Sa halagang 95 pesos, parang may piging na nagaganap sa loob ng bibig ko.

Nakakabusog balikan ang panahong halos 'sang siglo na ang nakalipas. Masarap palang damhin ang pagiging Filipino at ipag-sigawang dugong bayani ang nananalantay sa ugat ko kasabay ng isang makabuluhang dighay. Eto at halata naman sa tiyan...

Sarap: 4/5: Babalikan ko to sa araw ng kalayaan.
Lugar: 3/5: Mas patok kung mukhang piging ang ayos ng hapag.
Serbisyo: 5/5: Ang bilis dumating ng pagkain, hindi pa ko naiinip nasa harap ko na.
Halaga: 3/5: Sana may discount pag kabirthday at sing pogi ni Rizal.

Huling Hirit!

Dumaan ang summer na halos hindi ko napansin. Ewan ko ba kung ano na ang nangyayari sa akin, wala akong gana maglalabas at masrelax ako sa bahay lang. Dati ay mahilig naman ako mag swimming, pero bakit ngayon ay parang nawala ang hilig ko dito. Kung kelan pa naman masmadali na sa akin ang maligo sa swimming pool ay saka pa ako tinatamaan ng katamaran. Mag-aanim na buwan na nga kaming nakalipat sa bago naming bahay, pero kahit isang beses ay hindi pa ako naligo sa swimming pool sa clubhouse nito. Sa tuwing iiyakan kami ni Gaby para mag swimming, si Grace ang inuutusan kong para samahang siyang lumusong, at ako ay masaya na na pinapanood sila. Eto na ba ang epekto ng middle age crisis? Ang pagkawala ng hilig..pati sa paliligo? Pero wala pa naman ako sa middle age ah!?

Kung ano naman ang kinatamad kong maligo ngayon, ay siya naman hilig dito ng aking anak. Grabe ang hilig nito sa tubig. Sa tuwing papaliguan sa batya ay ayaw na nitong tumayo. Pag binitbit mo upang pwersahing patigilin ay kakapit sa batya at hindi bibitiw, kailangan mo siyang buhatin kasama ang batya. Kapag naman dinala namin sa clubhouse para magswimming, siguradong may iyakang magaganap pag pina-ahon na ng mommy nya.

Ang mga pangyayaring ito ang nagbigay sa akin ng idea para pasayahin siya. Kahit patapos na ang tag-araw ay naisipan kong dalhin ang aking anak sa beach. Sa La Luz beach resort sa Laiya San Juan Batangas ang napili ko. Halos puno na ang lahat ng araw, kaya wala na kong ibang option kundi ang huling linggo ng Mayo.

Isang linggo bago ang itinakdang araw. Eto at nambuwisit pa si Chedeng! Katakot-takot na masasakit na salita ang inabot sa akin ng bagyong ito. Pero hind ako nagpasindak, tumakbo agad sa palengke at bumili ng isang tray ng itlog. Ito ang i-aalay ko sa altar upang lumihis ang bagyo. Noon ko napatunayan na totoo ang hiwaga bumabalot sa itlog!

Mula sa Nuvali ay tumakbo ako ng halos 130KM bago marating ang La luz. Kasama na dito ang ilang pagkaligaw. Mabuti na lamang at hindi naging kumplikado ang direksyon na nasa website at ito lamang ang aking naging gabay.

Maaliwalas ang panahon, maulap pero hindi umuulan. para sa akin, eto ang perpektong panahon para bumabad sa dagat. Pagpasok sa resort ay agad tumambad sa amin ang maalon na dagat. Nakita ko ang gulat sa mata ni Gaby ng makita ito. Sa tuwa nga ay pumalakpak siya at itinaas ang kamay. Ganito ang madalas niyang gawin sa tuwing na eexcite..

At eto ang kanyang paboritong jumpshot..konting praktis na lang anak at aangat na rin ang paa mo sa lupa...

Isang Junior Premier ang tinuluyan namin. Tama lang ang laki ng kwarto para sa aming tatlo. Ang mahalaga ay may maayos na kama, air-con, sariling banyo at ang hot and cold water. Wala lang TV and bawat room nila dito. Ayos lang, hindi naman ako nagbayad ng 2,800 per day para manood ng TV. Mas ginugol namin ang buong araw sa labas at sa dagat.

Ang resort na ito ay mukhang dinesenyo para sa isang kumportableng bakasyon kasama ang pamilya. Kapansin-pansin ang mga facilities na karamihan ay angkop sa mga nagbabakasyon na may kasamang bata. Sa dining area ay may sapat na bilang ng high chair para sa mga bata, hindi mo na rin kailangan bumili ng tubig dahil mayroong mga mineral water dispenser na may hot and cold water pa. Ang mga life jacket ay maari mo ring hiramin ng walang karagdagang bayad. Obligado ka lang na magbayad ng 1,100 pesos kada araw para sa apat na meal (buffet). Lunch, Meryenda, Dinner at Breakfast. Hindi na masama, dahil nangangahulugan lang ito na hindi mo na puproblemahin ang pagkain mo sa buong araw at gabi na pananatili dito.

Sa Lunch ay naabutan namin ang mushroom soup, menudo, inihaw na manok, chopseuy at ginataang tilapya. Ang dessert naman ay manggo salad.

Matapos ang mahabang byahe..pagod at gutom..hindi na siguro masamang maubos ko 'to...

Sa Meryenda ay Chicken Sandwich, puto, pritong saging at pansit habhab

.

Matapos ang mahabang byahe...pagod at gutom kanina..ay hindi parin siguro masama na maubos ko 'to...

Sa Hapunan ay Corn soup, Chicken Teriyaki, Tuna in mushroom soup, roasted pork at pasta. May dessert na pakwan at bico.

Matapos ang mahabang byahe..pagod at gutom na dama ko parin naman hanggang gabi ay hindi naman siguro masamang maubos ko ulit 'to....

Sa Breakfast ay Scramble egg, chessedog, pritong galunggong, tinapay, cereal at saging.

Matapos ang mahabang byahe..pagod at gutom kahapon..ay mauubos ko parin to...

Walang espesyal sa bawat putahe, pero sa halagang halos 275 per meal na buffet, At no worries...e panalo na 'to. Uupo ka na lang kasi at i-eenjoy ang malabundok na pagkain sa tabing dagat.

At sa huli..isang masaya ay hindi malilimutang bakasyon ang nagpasaya sa aming anak..

Iyon ang mas mahalaga sa akin..

.

Lugar: 4/5 - Malinis na dagat at malinis na paligid.

Halaga: 5/5 - Hindi kailangan magbayad ng mahal sa masayang bakasyon.

Serbisyo: 3/5 - Masigasig ang mga staff..minsan lang ay kailangan mo pang magtanong ng importanteng detalye.

Pagkain: 3/5 - Pwede na..busog naman.

Sisig

Sa tuwing bubuksan ko ang menu ng kahit anong restaurant, siguradong napapa-order ako ng sisig pag meron nito. Swabe kasi ang sisig, bukod sa madaling kainin ay nakakatakam ang sarap.

Masarap ulamin sa kanin, ipalaman sa pandesal at gawing pulutan. Bagamat hindi ako umiinom, ilang platong sisig din naman ang kaya kong itaob.

MGA SANGKAP:

1/2 kilo Pork Mask (mukha/pisngi ng baboy)
100 grams Atay ng baboy o manok (durugin)
500 ml na mantika
1 pirasong Luya
5 pirasong siling haba na berde (hiniwa ng maliit)
2 kutsarang mayonaise
1 kutsarang kalamansi juice
1 kutsarang liquid seasoning
5 pirasong bawang (dinikdik)
2-3 pirasong sibuyas
2 itlog
Asin at paminta



PARAAN NG PAGLUTO:

Hugasan ang pork mask at hiwain ng katamtamang laki. Ilagay sa pressure cooker o kaserola at pakuluan hanggang lumambot kasama ang hiniwang luya, asin at paminta. (Mas mabuti kung may pressure cooker upang madali itong mapalambot). Kung gagamit ng pressure cooker, pakuluan ang baboy ng 15 to 20 mins. Kung wala naman ay maari itong pakuluan ng 40 mins to 1 hour hanggang maging malambot ng husto. Hanguin at palamigin. Kapag malamig na, ilagay sa plastik at ipasok sa freezer ng 1 hanggang 2 oras. Maari din itong i-freezer ng magdamag kung may panahon. Magpakulo ng mantika sa kawali na ang dami ay sapat upang lubog ang baboy pag pinirito. Mula sa freezer ay pirituhin ang baboy (Ang epekto ng sobrang lamig (frozen) na baboy na biglang inihulog sa kumukulong mantika ang magbibigay ng labis na lutong sa baboy na parang chicharon.) Siguraduhing takpan agad ang kawali upang maiwasang matalsikan ng mainit na mantika. Sa oras na humina na ang ingay mula sa pinipirito (3 hanggang 5 minuto), ay maari nang hanguin ang baboy. Muli itong palamigin (room temp), at tadtarin.

Sa isang maliit na kawali, ay maglagay ng mantika, at gisahin ang bawang. Hintayin maging golden brown saka ihulog ang dinurog na atay at ibuhos ang kalamansi juice, konting asin at paminta. Hayaang maluto ng kaunti ang atay ng mga 3 hanggang 5 minuto. Ihulog ang baboy, kasunod ng sili, at sibuyas bago haluin. Isunod ang mayonaise at ang liquid seasoning. Haluin muli hanggang magsama-sama ang lahat ng sangkap. Ilagay sa sizzling plate (kung meron) at lagyan ng itlog o direktang ihain sa kawali matapos mailagay ang itlog. Ihain na may sawsawang toyo, kalamasi at sili.

Sarap: 5/5 -Swabeng sarap.
Halaga: 4/5 - May pagkakataon na mahirap humanap ng pork mask.
Preparasyon: 2/5 - Mag-ingat sa tilamsik ng mantika.

Laing Gising

Mahirap magpigil ng antok. Marahil ay maka ilang beses narin akong lumampas sa pupuntahan dahil sa pagkakatulog sa sinasakyang jeep o bus. Ang isa pa sa matinding karanasan ko ay nang minsang sumakay ako ng bus sa terminal sa Bulacan papuntang Monumento. Dahil sa sobrang antok, pagkalapat pa lang ng puwet ko sa upuan ay sumabay na ang bagsak ng mga mata ko. Mahaba-haba rin ang tinakbo ng panaginip ko, at makalipas ang ilang sandali ay naramdaman kong may yumuyugyog sa akin. Pupungas-pungas kong binuksan ang mata, at sa harap ko ay ang kundoktor. "Boss, Bulacan na tayo!" Kala ko ay nananaginip lang ako...pero ng tingnan ko ang paligid ay ang terminal nga sa Bulacan nga ang kinaroroonan ng bus.

"Putcha! nag round trip ako!!!!?"

Gusto pa nga akong singilin ng dobleng pamasahe ng kunduktor, na lalo kong kinainis!

Katumbas marahil ng antok ko noon ang antok na dinanas ng mga magbubuko sa baba. Minsan ko silang nakasabay sa daan habang binabaybay ko ang kahabaan ng Tagaytay Road. Eto at ginawa na nilang malambot na kama ang nakasalansang bunga ng buko. Isang buko lang ang kumalas sa pagkakasalansan ay sigurado akong kasabay na silang gugulong nito sa daan.

Bilang tribute sa mga pagod at hapong masisispag na magbubuko ay gusto kong i-alay sa kanila ang nakakagising na putaheng ito. Ang paborito kong Laing Gising! Sigurado akong sa sarap, anghang at linamnam ay tanggal ang antok mo!


MGA SANGKAP

15-20 piraso ng pinatuyong dahon at tangkay ng gabi
2 Niyog, ginadgad at inipon ang gata
1 Buko (mala-uhog), kunin ang sabaw at laman
1/4 kilo ng Liempo (hiniwa ng manipis)
4 pirasong Tinapa (hinimay)
8 pirasong siling (berde) haba na hiniwa ng maliit (Kung hindi masyadong mahilig sa maanghang ay maaring alisin ang buto nito bago hiwain)
1 malaking sibuyas (hiniwa)
1 Luya (hiniwa ng pahaba)
Paminta at Asin

PARAAN NG PAGLUTO

Sa isang kaserola ay pagsama-samahin ang sibuyas, luya, sili at baboy. Lagyan ng konting asin at paminta at ibuhos ang sabaw ng buko. Hayaang kumulo ng limang minuto sa mahinang apoy. Ihulog ang tuyong dahon at tangkay ng gabi na piniraso. At ibuhos sa ibabaw ang hinimay na tinapa. Hayaan muling kumulo ng lima hanggang sampung minuto na hindi hinahalo (siguraduhing hindi natutuyo ang sabaw). Ibuhos ang gata at muling hayaang kumulo hanggang sa lumapot ng kaunti ang sabaw at lumabas ang langis nito. Panatiliing mahina ang apoy upang hindi masunog. Muling lagyan ng asin at paminta ayon sa panlasa. Ihain kasama ang mainit na kanin.

Sarap: 4/5 – Nakakagising ang anghang na may linamnam

Halaga: 3/5 – May mga panahong mahal ang niyog.
Preparasyon: 3/5 – Sana ay laging may gabi sa palengke.

A.S.I. (Adobo Systems Inc.)

Paborito ko ang adobo. Isa kasi ito sa pinaka simple putahe na walang kaparis sa sarap. Hindi ko ipagpapalit ang adobong pinoy sa adobado ng Mexico na minsan ko nang natikman. Adobo nang nanay ko ang klasikong paraan na pagluluto ng adobo na alam ko. Simple lang kasi ito, pagsasama-samahin lang ang lahat ng sangkap, at lulutuin sa mahinang apoy hanggang sa lumambot at kumatas ang langis mula sa karne, mapa manok o baboy man. Resulta? 100% purong sarap! Ang siguradong hahanap-hanapin mo..

Sampung taon pa lang ako noong una kong subukan na magluto ng adobo. Sobrang alat, sobrang asim, sobrang tamis na sinamahan pa nang pait ng maitim na karne dahil sa pagkasunog. Hmmm..hindi na masama sa sampung taon na dapat ay jolens at text pa lang ang hinahawakan.

Maaga akong namulat sa kusina. Naging panuntunan kasi sa aming bahay ang “division of labor”. Hindi ko naman masasabing abuso iyon,dahil kusang loob naman naming ginagawa nang may ngiti ang bawat trabaho. Kaya’t kung sino man ang mga nangutya sa akin noon at ngayon na napabayaan ako sa kusina..hindi ako apektado! Totoo kasi...

Mula noong sampung taon ako hanggang ngayon ay hindi tumigil ang kagustuhan kong makapagluto ng adobo na hinahanap ng panlasa ko. Hango sa ibat-ibang teknik, mula sa ibat-ibang paraan nang pagluluto nito at nakagawa ako nang sariling bersyon. Sakto sa alat, asim at tamis. Sakto sa sawi sa pag-ibig, may bagong pag-ibig at matagal nang umiibig. Pwede sa tag-araw o tag-ulan. Pwedeng pang araw-araw at hindi pagsasawaan..

Ganito katindi ang buid-up ko, para lang maniwala kayong MARUNONG AKONG MAGLUTO!!!!

Mga Sangkap:
1 kilong baboy (liempo)
Sampung butil ng bawang
Kalahating Tasang Toyo
Kalahating Tasang Suka
Dalawang kutsarang oyster sauce
Dalawang kutsarang Asukal na pula
Isang kutsaritang pamintang buo
isang dahon ng Laurel
Kalahating tasa ng tubig.

Paraan ng Pagluluto:

Sa isang kaldero ay ilagay ang baboy, isang butil ng dinikdik na bawang,laurel,pamintang buo,asukal,toyo,oyster sauce at tubig. Haluin mabuti hanga maging pantay ang kulay ng karne. Ibuhos ang suka (pagkabuhos ng suka ay sadyang hindi ko ito hinahalo hanggang sa kumulo, sa paniniwalang mas nagiging pantay ang lasa nito kung kusa itong manunoot sa karne. Wala naman masama kung maniwala sa kasabihan ng matatanda..) Isalang sa mahinang apoy at hayaang kumulo bago haluin. Tatagal nang halos apat-napung minuto bago patayin ang apoy. Siguraduhing hinahalo paminsan minsan upang hindi masunog o manikit ang laman.

Habang pinapalambot ang karne, kumuha ng kawali at lagyan ng isang tasang mantika. Ihulog ang dinikdik na natirang bawang at lutuin hanggang maging malutong light golden brown. Wag hayaang masunog ang bawang. Itabi ang kawali at mantika na pinag lutuan ng bawang.

Hanguin ang karne matapos itong mapalambot at ibukod ang pinagpakuluan. Isalang muli ang pinagpakuluan hanggang sa mag reduce ng kaunti , ito ang magsisilbing sarsa ng adobo. . Muling initin ang mantika na pinaglutuan ng bawang, dito ay ipipirito ang karne hanggang maging golden brown at mag karamel ng kaunti. Hanguin at i-drain ang mantika.

Muling ibalik ang karne sa sarsa nito at ibudbod ang tinustang bawang. Ihain kasama ng mainit na kanin.

Sarap: 5/5 - Extra Super Sarap
Halaga: 5/5 - Kayang-kaya ng minimum wages
Preparasyon: 3/5 - Tagaktak ng konti ang pawis