Peace, Love & Sugar

Payapang pagmamahal na ubod ng tamis... Wala na akong hahanapin pa..
Salamat sa isang kumpletong buhay...
Amen.

Si Dora the Haloween Explorer

Naging abala ang nakaraang sabado sa amin. Nagkaroon kasi ng Haloween party sa aming village at siniguro namin na makasama. Actually, hindi naman ako ang excited, si Gaby talaga (weee!) Noong nakaraang linggo pa lang ay nag-isip na ako ng isusuot ni Gaby. Kaso may pagka maselan sa damit e, ayaw nya ng mga karaniwang custume na nabibili sa para sa haloween custume party. Ang isa pa, medyo mapapagastos pa kung bibili at isang beses lang isusuot (kuripot?). Hindi naman, makakalakihan lang e! (nagpaliwanag pa). Dito pumasok ang ilang konsepto at matapos ang ilang araw na pagpupuyat at pagtatalo, nagkasundo kami sa paboritong cartoon character si Dora the Explorer!

Simple lang pala etong si Dora, T-shirt, Short, Rubber Shoes, beads at backpack...Bueno! Ola chika!Parang nasa bahay lang!

Next issue, ano ang isusuot ko? Naka custume ba pati daddy? Una plinano ko na ternuhan si Gaby. Kaso, hindi naman bagay sakin ang maging boots the monkey, sa gwapo kung to.Baka naman mag mukha akong suman sa lihiya kung magiging ako si the map. Napressure na tuloy ako dahil biyernes na ay wala pa ko custume. Nang dumating ang sabado, naisip ko na lang na mag suot na lang ng normal na damit na karaniwan ko sinusuot. Ngayon, kung sakali na hindi ako papasukin at tanungin kung ano ang costume ko, sasabihin ko na lang na..."Ha? Itinanong mo ko kung sino ako? Shhhh..serial killer!" o kaya bigla na lang ako sisigaw ng..."Hello po! Ako Budoy!!!".

E di solb!

Bicol Express to the MAX!

Hindi pa ko nakakarating sa Bicol. Pero bakit ang dami kong paboritong pagkain na galing o gawa sa Bicol. Mahilig ako sa Pili nuts, lalo na pag nakalagay pa sa shell at ako pa yung mag bubukas. Mas may challenge mas masarap.

Paborito ko rin ang laing, minsan nga ay pinapalaman ko pa to sa pandesal at mas ginaganahan pa ako kapag ako mismo ang nag kudkod at nagpiga ng niyog.

Nakakain narin ako ng pansit bato, sabayan pa ng dinuguan, ang sarap!

At syempre ang pinaka paborito ko at nagpapainit ng araw ko..ang Bicol Express to the max!

SANGKAP:

1 kilo Liempo (Ihiwalay ang taba at balat at hiwain na pa cubes)
1 Malaking Sibuyas na Puti (chopped)
2 Niyog (2 tasa ng kakang gata at 4 na tasa ng ikalawang piga)
1/4 na kilo ng siling berde o siling pang sigang (chopped)
1 kutsarang siling labuyo (chopped)
1 kutsarang luya (crushed)
1 kutsarang bagoong alamang
1/2 kutsarang chicken powder
asin at paminta


PARAAN NG PAGLUTO:

Ilagay ang taba at balat ng baboy sa kawali. Hayaang maluto hanggang sa lumabas ang sariling mantika. Ibuhos ang luya at igisa. Ilagay ang sibuyas at siling berde. Haluin muli bago ibuhos ang liempo. Lagyan ng kaunting asin at paminta. Haluin at hayaan ng ilang minuto. Ibuhos ang 4 na tasa ng ikalawang gata. Ilagay ang chicken powder at ang bagoong alamang. Haluin muli at takpan. Pakuluin sa mahinang apoy ng 2 at kalahating oras. Ibuhos ang 2 tasang kakang gata at hayaang kumulo pa ng 30 minuto. Mapapansin na nagmantika na ang gata at halos lusaw na ang mga sili. Patayin ang apoy. Ihain kasabay ng mainit na kanin.

Sarap: 5/5 - Mapapasipol ka sa sarap.
Halaga: 3/5 - Kung mahal ang liempo, pwede ang pigue o tiyan.
Preparasyon: 4/5 - Mas masarap kung ikaw mismo ang pipiga ng kakang gata.

Take Five! Army Navy Burger & Burrito

Kung comfort food lang naman ang pag-uusapan. Yung madaling kainin at nakakatakam, burger lang ang pumapasok sa isip ko. Noong nakarating ako sa Amerika, isa ang burger na dahilan kung bakit excited ako makatuntong sa bayan ni Uncle Sam. Limang burger store nga ang tinikman ko para lang masatisfy ang pagnanasa ko dito. Tama nga ang hinala ko, sa Amerika ko matitikman ang pinaka panalong burger sa panlasa ko. Ang In and out burger! Mahihirapan na yata ako makahanap ng katapat ng burger na 'to. Sana ay makarating din ito sa Pinas.

Kahapon ay sinubukan ko ang Army Navy, matagal ko nang naririnig ito pero hindi ko pa nasubukan. Hanggang sa nagbukas ang bagong branch nito sa Solenad 2 Nuvali Laguna, halos 9 na kilometro lang ang layo mula sa aming bahay. Kapag nasarapan ako dito, patay na naman ang budget, and dali kasing puntahan at malapit pa.

Sa unang tikim ko, sinubukan ko muna ang klasikong pagkain sa kanilang menu.

Chicken Burrito:

Hmmmm..sa unang kagat, nag-isip pa ako kung nasarapan ba ko o gutom lang ako.

Pangalawang kagat, nandun nga yung lasa ng burrito na hinahanap ko. Nagustuhan ko ang pagka juicy ng manok sa loob. Hindi man ito sing linamnam ng burrito na inaasahan ko, babalikan ko parin ito at susubukan ang pork at beef.

Cheese Quessadillas:

Tama lang ang lasa, hindi masyadong maalat ang kumbinasyon ng mga keso sa loob. Malambot ang tortilla. Ang gusto ko sa quessadillas ay yung medyo tustado at may lutong ng kaunti ang gilid at malambot ang gitna at halos nalulusaw na ang keso sa loob.

Double Burger:

Ang juicy ng burger, malinamnam at malasa. Ang sarap kagatin, nakakatakam at nakakapag laway ang hitsura nito. Sinabayan pa ng amoy ng patties nito na mapang-akit sa aking marupok na panlasa. Kaya ano pa ang magagawa ko..Obey first before I complaint.

Hindi man napantayan ng Army Burger ang paborito kong burger. Hindi naman makakaila na nag enjoy ako dito. Hindi lang ako pati nga si Gaby.

Kaya babalikan ko ito..

Balik kad!

Sarap: 4/5 – Pasulong kad!

Presentasyon: 3/5 – Liko sa kaliwa kad!

Lugar: 5/5 – Pulutong hinto!

Serbisyo: 3/5 – Tikas Pahinga!

Halaga: 4/5 - Pugay kamay!

Pocherong Bulalo

Isang gabi, bigla ko nalang napagtanto na sa tagal pala ng pagsasama namin ni Grace ay isang beses pa lang niya akong pinagluto, at iyon ay noong girlfriend ko pa lang siya. Hindi ko makakalimutan ang putaheng iyon. Spaghetti espesyal..ala ketchup. Teknikali, may kulang o sobra sa timpla ng spaghetti niya. Pero personali, maniwala man siya o hindi iyon ang pinakamasarap na spaghetting natikman ko at hanggang ngayon inaasam ko parin na muling matitikman...

Noong nakatira pa kami sa bahay ng aking magulang sa bulacan, madalas niyang i-alibi na ayaw niyang magluto dahil nahihiya siya sa nanay ko at baka hindi masarap ang kalabasan nito. Pero ngayon na may sarili na kaming bahay dito sa laguna.... hmmmm..parang nakalimutan na nya ang pangako niya. Kaya hinamon ko siya isang gabi.

Lloyd: Bi, hanggang ngayon hinde mo pa ko pinagluluto. Hindi ba sabi mo pag tayo na lang sa bahay, ikaw na magluluto?

Grace: (natulala..nabigala...nagulat) Ah e..oo nga..o sige, ako magluluto bukas..ano ba gusto mong ulam?

Lloyd: Pochero...(ngiting parang kontrabida sa teleserye)

Grace: (Napalunok)

Lloyd: Baka...pocherong baka!

Grace: (Nanmilog ang mata) May ashuete ba yun?

Hindi ko rin natiis ang asawa ko. Kinabukasan, namili ako ng putahe at as uswal ako parin ang hari ng kusina. Sa susunod nga ay hindi na ako bibili ng sandok at kawaling kulay blue, para naman unisex na ang gamit sa kusina at pwede narin niyang gamitin in the future!

SANGKAP:

1/2 kilo Bulalo (baka)

1 pirasong mais (hiniwa na dalawang pulgada ang kapal)

1 pirasong kamote

3 pirasong saging na saba

5 dahon ng pechay baguio

10 pirasong baguio beans

1 sibuyas

2 pirasong bawang

1 kamatis

5 table spoon Tomato sauce

Patis

Asin at Paminta

PARAAN NG PAGLUTO:

Palambutin ang bulalo sa isang litro ng tubig kasama ang asin, paminta, at sibuyas. Sa unang kulo ay ihulog ang kamote. Hayaang kumulo hanggang lumambot ng 1 1/2 hanggang 2 oras. Hanguin ang kamote, durigin at lamasin. Muling ihalo sa bulalo. Isunod ihulog ang mais at hayaang kumulo ng 15 minuto pa bago patayin ang apoy.

Sa isang kawali, ipirito ang saging na saba sa kaunting mantika. Hintayin hanggang maging golden brown ang kulay at itabi. Igisa sa ang bawang at sibuyas. Ilagay ang bulalo, haluin ng marahan, huwag hayaang madurug ang laman. Timplahan ng patis, at paminta. Ibuhos ang tomato sauce at ang sabaw mula sa pinakuluang bulalo. Ilagay ang pechay at baguio beans. Pakuluin ng limang minuto. Patayin ang apoy at ihulog ang mais at ang saging na saba. Ihain kapartner ang patis, kalamansi at bagong saing na kanin.

Sarap: 5/5 - Sulit ang pagod, nanunuot ang sarap hanggang buto.

Halaga: 2/5 - Mahirap humanap ng bulalo na hindi bababa sa dalawang kilo.

Preparasyon: 4/5 - Hindi na kailangan ang achuete.

Nakakabaliw

Ang nakaraang linggo na yata ang pinaka mahabang linggo na naranasan ko. Ganito pala ang pakiramdam pag may sakit ang pinakamamahal. Bawat sakit, hapdi at lungkot na nararamdaman niya ay pitong daang ulit ang katumbas sa puso ko. Bawat segundo, menuto at oras ay parang taon, dekada at siglo.

Nakakabaliw...

Nakaka praning...

Paikot-ikot ang mata sa apat na sulok ng malamig na kwarto.

Ngayon ay lubos ko nang naiintindihan ang tama na dala ng pagka bored...sa isip... sa salita... at sa gawa..

Kaya pala may mga taong sadyang gumagawa ng ganitong bagay..

Salamat sa Diyos at magaling at masigla na ang aking anak...

Si Jose, Ako at si Crisostomo

Si Dr. José Protasio Rizal Mercado y Alonso Realonda (Hunyo 19, 1861–Disyembre 30, 1896) ay ang pampito sa labing-isang anak ng mag-asawang Francisco Engracio Rizal Mercado y Alejandro at ng asawa nitong si Teodora Morales Alonzo Realonda y Quintos. Ipinanganak si José Rizal sa Calamba, Laguna. Sina Saturnina, Paciano, Narcissa, Olimpia, Lucia, Maria, Jose, Concepcion, Josefa, Trinidad at Soledad ang kanyang mga kapatid.

Si Lloyd Sese y Rivera (Hunyo 19, 19SECRET - Humihinga pa hanggang sa kasalukuyan) ay ang pang apat at bunso sa apat na anak ng mag-asawang Mario Sese y Lagman at ng asawa nitong si Genoveva Rivera y Estrella. Ipinanganak si Lloyd Sese sa Guiguinto, Bulacan. Sina Levi, Rodel at Sheryll ang kanyang mga kapatid.

Ang ina ni Rizal ay siyang kaniyang unang guro at nagturo sa kaniya ng abakada noong siya ay tatlong taon pa lamang. Noong siya naman ay tumuntong ng siyam na taon, pinadala siya sa Biñan, Laguna upang mag-aral sa ilalim ng pamamatnubay ni Justiano Aquino Cruz. Ilang buwan ang nakalipas, pinayuhan niya ang magulang ni Rizal na pag-aralin siya sa Maynila.

Ang ina ni Lloyd ay siyang kaniyang unang guro at nagturo sa kaniya ng abakada noong siya ay limang taon na (slow learner). Noong siya naman ay tumuntong sa anim na taon, pinadala siya sa Balagtas,Bulacan upang mag-aral sa ilalim ng patnubay ni Mrs. Martin (hindi ko na tanda ang buo niyang pangalan). Ilang buwan ang nakalipas, sinabihan niya ang magulang ni Lloyd na sakit ito sa ulo dahil sa sobrang daldal.

Ang Ateneo Municipal de Manila ang unang paaralan sa Maynila na kaniyang pinasukan noong ikadalawa ng Enero 1872. Ayon sa isang salin ng Noli me tangere ni Guzman atbp., sa kaniyang pananatili sa paaralang ito, natanggap niya ang lahat ng mga pangunahing medalya at notang sobresaliente sa lahat ng aklat. Sa paaralan ding ito niya natanggap ang kaniyang Batsilyer sa Sining na may notang sobresalyente kalakip ang pinakamataas na karangalan.

Ang La Consolacion sa Balagtas Bulacan ang unang paaralan na kaniyang pinasukan noong ikadalawa ng Hunyo 19XX. Ayon sa isang salin ng kwento ng mga tsismosa sa Bulacan atbp., sa kanyang pananatili sa paaralang ito, natanggap niya lahat ang mga pangunahing medalya sa Loyalty award at best in writing noong kinder.

Nang sumunod na taon, siya ay kumuha ng Pilosopiya at Panitikan sa Pamantasan ng Santo Tomas. Sa Ateneo, kasabay niyang kinuha ang agham ng Pagsasaka. Pagkaraan, kinuha niya ang kursong panggagamot sa nasabing Pamantasan (Santo Tomas) pagkatapos mabatid na ang kaniyang ina ay tinubuan ng katarata. Noong Mayo 5, 1882, nang dahil sa hindi na niya matanggap ang tagibang at mapansuring pakikitungo ng mga paring Kastila sa mga katutubong mag-aaral, nagtungo siya sa Espanya. Doo'y pumasok siya sa Universidad Central de Madrid, kung saan, sa ikalawang taon ay natapos niya ang karerang Medisina, bilang "sobresaliente" (napakahusay). Nang sumunod na taon, nakamit niya ang titulo sa Pilosopiya-at-Titik.

Nang sumunod na mga taon, siya ay kumuha ng Bachelor of Science in Electronics & Communication Engineering sa Adamson University. Sa labas ng paaralan kasabay niyang kinuha ang pag mamadyik at pagtambay sa bilyaran. Pagkaraan ay kumuha din siya ng kurso sa pag-arte pagkatapos mabatid na pangarap ng nanay niya ang magkaroon ng anak na sikat. Noong 2002, nang dahil sa hindi na niya matanggap ang tagibang at mapansuring pakikitungo ng mga kakilala na hindi siya artistahin ay nagpasya siyang magtungao sa Laguna upang doon nalang magtrabaho. Doo'y pumasok siya sa Hitachi GST Philippines, kung saan, sa ikalawang araw pa lang ay naiwan na siya ng shuttle papasok sa opisina kaya nag lakad, nag jeep at naligaw. Nang sumunod na taon ay nakuha niya ang perfect attendance award dahil sa hindi pag-absent kahit walang ginagawa.

Naglakbay siya sa Pransya at nagpakadalubhasa sa paggamot ng sakit sa mata sa isang klinika roon. Pagkatapos ay tumungo siya sa Heidelberg, Alemanya, kung saan natamo pa ang isang titulo.
Sa taon din ng kaniyang pagtatapos ng Medisina, siya ay nag-aral ng wikang Ingles, bilang karagdagan sa mga wikang kaniya nang nalalaman gaya ng Pranses. Isang dalubwika si Rizal na nakaaalam ng Arabe, Katalan, Tsino, Inggles, Pranses, Aleman, Griyego, Ebreo, Italyano, Hapon, Latin, Portuges, Ruso, Sanskrit, Espanyol, Tagalog, at iba pang mga katutubong wika ng Pilipinas.

Naglakbay siya sa Singapore at nagpakadalubhasa sa pagpuna ng mali ng ibang kumpanya. Pagkatapos ay tumungo sa Batam, Indonesia, kung saan siya unang nakakita ng aquariun na maraming sumasayaw na hindi isda.

Marami pang pagkakapareho ang buhay namin ni Rizal, kasama na dito ang dami ng naging babae niya. Ay ako pala isa lang...si Grace lang.

Pero ang pinaka malaking pagkakapareho namin ay parehong Birthday namin ngayon.

Upang lubos kong madama ang kabayanihan ng idol ko. Pinili kong i-celebrate ang birthday ko sa isang restaurant sa Solenad Nuvali Sta. Rosa Laguna ang Crisostomo. Hango kay Crisostomo Ibarra o Juan Crisostomo Ibarra y Magsalin na pagunahing tauhan sa nobela ni Jose Rizal na Noli Me Tangere.



Bilib ako sa mga putaheng inihahain ng restaurant na ito. Bukod sa lahat ay pinoy na pinoy ay nakaka-aliw ang mga pangalan ng putahe na simisimbolo sa mga tauhan ng mga nobelang akda ni Rizal at ilan sa mahahalagang bahagi ng buhay niya.

Para sa inumin ay umorder ako ng Tamarind Ice Tea (Bottomless). Unang pagkakataon kong nakainom ng sampalok juice..akala ko kasi dati ay pangsigang lang ang sampalok. Pwede rin palang gawing pampalamig na totoo naman refreshing!

Si Grace naman ay umorder ng Calamansi with malunggay juice. Parang pagkainom mo nito ay sumabak ka na rin sa isang cleansing diet at makakahiyan mo nang kumain ng kolasterol.

KKK Barbeque. Pangalan pa lang ay parang may himagsikan ka nang sasabakan. Masarap at malasa. Pero sa halagang 185 (2 pcs.), parang pera ang napunit ko at hindi cedula.


Pinoy Paella. Mapapakanta ka na "Ako'y isang Pinoy sa pusot diwa..." sa sarap ng paellang ito. Hindi matapang ang lasa tulad ng kadalasang paella na nakain ko. May sahog na sugpo, liempo, manok at adobo flakes. Ito ang dahilan na naglasang pinoy ang paellang 'to. Sa halagang 350 ay pwedeng pagsaluhan ng 3 tao.

Halo-halo ni Crisostomo sa dessert. Malinamnam pero hindi matamis. Sa tantya ko ay ang gatas na ginamit dito ang nagpalinamnam ng lasa nito. Sa halagang 95 pesos, parang may piging na nagaganap sa loob ng bibig ko.

Nakakabusog balikan ang panahong halos 'sang siglo na ang nakalipas. Masarap palang damhin ang pagiging Filipino at ipag-sigawang dugong bayani ang nananalantay sa ugat ko kasabay ng isang makabuluhang dighay. Eto at halata naman sa tiyan...

Sarap: 4/5: Babalikan ko to sa araw ng kalayaan.
Lugar: 3/5: Mas patok kung mukhang piging ang ayos ng hapag.
Serbisyo: 5/5: Ang bilis dumating ng pagkain, hindi pa ko naiinip nasa harap ko na.
Halaga: 3/5: Sana may discount pag kabirthday at sing pogi ni Rizal.

Huling Hirit!

Dumaan ang summer na halos hindi ko napansin. Ewan ko ba kung ano na ang nangyayari sa akin, wala akong gana maglalabas at masrelax ako sa bahay lang. Dati ay mahilig naman ako mag swimming, pero bakit ngayon ay parang nawala ang hilig ko dito. Kung kelan pa naman masmadali na sa akin ang maligo sa swimming pool ay saka pa ako tinatamaan ng katamaran. Mag-aanim na buwan na nga kaming nakalipat sa bago naming bahay, pero kahit isang beses ay hindi pa ako naligo sa swimming pool sa clubhouse nito. Sa tuwing iiyakan kami ni Gaby para mag swimming, si Grace ang inuutusan kong para samahang siyang lumusong, at ako ay masaya na na pinapanood sila. Eto na ba ang epekto ng middle age crisis? Ang pagkawala ng hilig..pati sa paliligo? Pero wala pa naman ako sa middle age ah!?

Kung ano naman ang kinatamad kong maligo ngayon, ay siya naman hilig dito ng aking anak. Grabe ang hilig nito sa tubig. Sa tuwing papaliguan sa batya ay ayaw na nitong tumayo. Pag binitbit mo upang pwersahing patigilin ay kakapit sa batya at hindi bibitiw, kailangan mo siyang buhatin kasama ang batya. Kapag naman dinala namin sa clubhouse para magswimming, siguradong may iyakang magaganap pag pina-ahon na ng mommy nya.

Ang mga pangyayaring ito ang nagbigay sa akin ng idea para pasayahin siya. Kahit patapos na ang tag-araw ay naisipan kong dalhin ang aking anak sa beach. Sa La Luz beach resort sa Laiya San Juan Batangas ang napili ko. Halos puno na ang lahat ng araw, kaya wala na kong ibang option kundi ang huling linggo ng Mayo.

Isang linggo bago ang itinakdang araw. Eto at nambuwisit pa si Chedeng! Katakot-takot na masasakit na salita ang inabot sa akin ng bagyong ito. Pero hind ako nagpasindak, tumakbo agad sa palengke at bumili ng isang tray ng itlog. Ito ang i-aalay ko sa altar upang lumihis ang bagyo. Noon ko napatunayan na totoo ang hiwaga bumabalot sa itlog!

Mula sa Nuvali ay tumakbo ako ng halos 130KM bago marating ang La luz. Kasama na dito ang ilang pagkaligaw. Mabuti na lamang at hindi naging kumplikado ang direksyon na nasa website at ito lamang ang aking naging gabay.

Maaliwalas ang panahon, maulap pero hindi umuulan. para sa akin, eto ang perpektong panahon para bumabad sa dagat. Pagpasok sa resort ay agad tumambad sa amin ang maalon na dagat. Nakita ko ang gulat sa mata ni Gaby ng makita ito. Sa tuwa nga ay pumalakpak siya at itinaas ang kamay. Ganito ang madalas niyang gawin sa tuwing na eexcite..

At eto ang kanyang paboritong jumpshot..konting praktis na lang anak at aangat na rin ang paa mo sa lupa...

Isang Junior Premier ang tinuluyan namin. Tama lang ang laki ng kwarto para sa aming tatlo. Ang mahalaga ay may maayos na kama, air-con, sariling banyo at ang hot and cold water. Wala lang TV and bawat room nila dito. Ayos lang, hindi naman ako nagbayad ng 2,800 per day para manood ng TV. Mas ginugol namin ang buong araw sa labas at sa dagat.

Ang resort na ito ay mukhang dinesenyo para sa isang kumportableng bakasyon kasama ang pamilya. Kapansin-pansin ang mga facilities na karamihan ay angkop sa mga nagbabakasyon na may kasamang bata. Sa dining area ay may sapat na bilang ng high chair para sa mga bata, hindi mo na rin kailangan bumili ng tubig dahil mayroong mga mineral water dispenser na may hot and cold water pa. Ang mga life jacket ay maari mo ring hiramin ng walang karagdagang bayad. Obligado ka lang na magbayad ng 1,100 pesos kada araw para sa apat na meal (buffet). Lunch, Meryenda, Dinner at Breakfast. Hindi na masama, dahil nangangahulugan lang ito na hindi mo na puproblemahin ang pagkain mo sa buong araw at gabi na pananatili dito.

Sa Lunch ay naabutan namin ang mushroom soup, menudo, inihaw na manok, chopseuy at ginataang tilapya. Ang dessert naman ay manggo salad.

Matapos ang mahabang byahe..pagod at gutom..hindi na siguro masamang maubos ko 'to...

Sa Meryenda ay Chicken Sandwich, puto, pritong saging at pansit habhab

.

Matapos ang mahabang byahe...pagod at gutom kanina..ay hindi parin siguro masama na maubos ko 'to...

Sa Hapunan ay Corn soup, Chicken Teriyaki, Tuna in mushroom soup, roasted pork at pasta. May dessert na pakwan at bico.

Matapos ang mahabang byahe..pagod at gutom na dama ko parin naman hanggang gabi ay hindi naman siguro masamang maubos ko ulit 'to....

Sa Breakfast ay Scramble egg, chessedog, pritong galunggong, tinapay, cereal at saging.

Matapos ang mahabang byahe..pagod at gutom kahapon..ay mauubos ko parin to...

Walang espesyal sa bawat putahe, pero sa halagang halos 275 per meal na buffet, At no worries...e panalo na 'to. Uupo ka na lang kasi at i-eenjoy ang malabundok na pagkain sa tabing dagat.

At sa huli..isang masaya ay hindi malilimutang bakasyon ang nagpasaya sa aming anak..

Iyon ang mas mahalaga sa akin..

.

Lugar: 4/5 - Malinis na dagat at malinis na paligid.

Halaga: 5/5 - Hindi kailangan magbayad ng mahal sa masayang bakasyon.

Serbisyo: 3/5 - Masigasig ang mga staff..minsan lang ay kailangan mo pang magtanong ng importanteng detalye.

Pagkain: 3/5 - Pwede na..busog naman.